Aleat apo spiun? Raportet tronditëse që nxjerrin në dritë përgjimin izraelit ndaj zyrtarëve amerikanë …

Nga Redaksia – Një seri raportesh të publikuara së fundmi nga media amerikane dhe ndërkombëtare kanë ndezur alarmin në Washington, pasi pretendohet se Izraeli ka intensifikuar aktivitetet e spiunazhit kundër vetë zyrtarëve të lartë të Shteteve të Bashkuara të Amerikës. Israel, i konsideruar prej dekadash aleati më i afërt i SHBA-së në Lindjen e Mesme, tashmë po përshkruhet nga disa zyrtarë amerikanë si një “kërcënim kritik kundërzbulimi”.

Sipas raportimeve, objektivat e përgjimeve kanë qenë figura kyçe të administratës amerikane që merren me negociatat dhe politikat ndaj Iranit dhe Lindjes së Mesme. Mes emrave të përmendur janë Steve Witkoff, negociatori kryesor i Presidentit Donald Trump për Iranin, Elbridge Colby, një nga zërat më të fortë për kufizimin e ndërhyrjeve ushtarake amerikane jashtë vendit, si dhe Michael DiMino, drejtues i politikave për Lindjen e Mesme.

Raportet pretendojnë se personel amerikan i mbrojtjes në Izrael ka zbuluar spyware të instaluar fshehurazi në telefonat e tyre, ndërsa një zyrtar i lartë amerikan e ka përshkruar aktivitetin izraelit si “jashtë kontrollit”.

Edhe më tronditës është fakti se Pentagoni raportohet ta ketë ngritur nivelin e kërcënimit të kundërzbulimit nga Izraeli në shkallën “kritike”, niveli më i lartë i mundshëm. Sipas mediave amerikane, disa zyrtarë amerikanë besojnë se aktiviteti i inteligjencës izraelite tashmë konsiderohet më agresiv se ai i disa vendeve kundërshtare të SHBA-së.

Në të njëjtën kohë, oficerë izraelitë vazhdojnë të kenë akses të zgjeruar brenda strukturave të CENTCOM, ndërsa në Kongresin amerikan po shtyhen iniciativa për integrimin më të thellë të sistemeve ushtarake dhe të të dhënave mes dy vendeve. Kjo ka ngritur pikëpyetje serioze brenda qarqeve të sigurisë amerikane: si mund të konsiderohet “partner strategjik” një shtet që akuzohet se përgjon vetë negociatorët amerikanë?

Edhe pse ambasada izraelite në Washington ka mohuar kategorikisht akuzat për spiunazh ndaj SHBA-së, raportet tregojnë se tensionet mes dy aleatëve historikë janë rritur ndjeshëm, sidomos për shkak të negociatave me Iranin dhe zhvillimeve të fundit në Lindjen e Mesme.

Historia e përgjimeve izraelite ndaj SHBA-së nuk është e re. Dokumente dhe raste të mëparshme kanë treguar se shërbimet izraelite kanë ndjekur prej dekadash informacione mbi politikën amerikane në Lindjen e Mesme, sidomos gjatë negociatave me Iranin.

Këto raportime përfaqësojnë një nga krizat më serioze të besimit mes Washingtonit dhe Tel Avivit në dekadat e fundit.

Ndalohet kopjimi pa lejen e portalit new.patriotikmedia.al/. Ky material është i mbrojtur sipas ligjit nr. 35/2016 për të drejtën e autorit dhe të drejtat e lidhura me të.